မောင်မောင်တစ်ယောက် သူ့အမေနဲ့ အသုဘလိုက်ပို့ခဲ့ပါတယ်။ နောက် ၄ ရက်လောက်လည်း ကြာရော ဖျားပါလေရော။ ဖျားပြီး ကယောင်ကတမ်းတွေ အော် ၊ မျက်စိကလည်း ရဲတွတ်နေလို့။ အမှောင်ထဲမှာ ကုတ်ကုတ်လေး အဖျားတွေတက်နေတဲ့ မောင်မောင်ကို သူ့အဖွားက သရဲဝင်ပူးနေပါတယ်ဆိုပြီး ရေပန်းတွေတောက်၊ မောင်မောင့်အမေကို ရမရာ မရှိအောင် ဆူတော့တာပဲ။ မောင်မောင်အမေ့ကတော့ ညနေ ဆေးခန်းသွားပြမှ ဖြစ်မယ်ဆိုပြီး မောင်မောင့်ကို ရေပတ်တိုက်ပေးရင်း ညနေကိုသာ စောင့်နေတော့တယ်။
ညနေ ဆေးခန်းဖွင့်တာနဲ့ ဆေးခန်းတန်းပြေးတော့တာပဲ။ ဆရာဝန်က ရောဂါလက္ခဏာတွေကိုမေးတော့ အဖျားကြီးတဲ့အကြောင်း နှာရည်တွေကျပြီး ချောင်းတွေဆိုးတဲ့အကြောင်းပြောပြတယ်။ မျက်စိတွေလည်း နီပြီး အလင်းလည်း ကြောက်လို့ အဖွားဖြစ်သူကတောင် သရဲဝင်ပူးတယ် ထင်နေတဲ့ အကြောင်းပြောပြတော့ ဆရာဝန်မလေးခမျာ ရယ်ပါလေရော။ နောက်စမ်းသပ်စစ်ဆေးမှုတွေလုပ်ပြီး ကလေးကို ကာကွယ်ဆေးထိုးဖူးလား မေးတယ်။
မောင်မောင့်မေမေက မောင်မောင့်ကို အရမ်းချစ်တော့ ကာကွယ်ဆေးထိုးရင် ကလေးနာမှာစိုးလို့ဆိုပြီး ဘာမှ မထိုးတဲ့အကြောင်းပြောတော့ ဆရာဝန်မလေးက အဲလိုမလုပ်ဖို့ ပြောပါလေရော။ နောက်မောင်မောင်ကို ပါးစပ်ဟခိုင်းပြီး ကြည့်တယ်။ ဝက်သက်ဖြစ်နိုင်ကြောင်း ရှင်းပြပြီး ကလေးကို မူကြိုမပို့သေးဖို့ ဆေးသေချာတိုက်ဖို့ အဖျားကြီးရင် ရေပတ်တိုက်ပေးဖို့တွေကို သေချာမှာတယ်။ ဆေးခန်းကို နောက်နေ့လာဖို့လည်း မှာလိုက်တယ်။
နောက်လူနာလည်း မလာသေးတော့ မောင်မောင့်မေမေက ဝက်သက်ရောဂါဆိုတာ ဘာလည်း ဘာတွေဖြစ်နိုင်လဲဆိုပြီး သိချင်တာတွေ မေးနေတယ်။ ဆရာဝန်မလေးက ဝက်သက်ရောဂါဆိုတာ ဗိုင်းရပ်စ်ပိုးကြောင့် ဖြစ်တာဖြစ်ကြောင်း လေကတဆင့် ကူးစက်တတ်ကြောင်း ဒါမှမဟုတ် ရောဂါပိုးရှိသူရဲ့ တံတွေး သလိပ်စတဲ့ တစ်ခုခုကို ကိုင်တွယ်မိရာကနေတဆင့်လည်း ကူးစက်တတ်ကြောင်း ပြောပြတယ်။ မောင်မောင်လေးကို သေချာမေးမှ လွန်ခဲ့တဲ့ ၂ ပတ်လောက်က သူ့မူကြိုက သူငယ်ချင်းတစ်ယောက် ဖျားပြီး အနီစက်တွေထွက်တယ်တဲ့။
ရောဂါပိုးကူးစက်ခံရပြီး ၁၀ ရက်ကနေ ၁၄ ရက်အတွင်းမှာ လက္ခဏာပြကြောင်း တစ်ပတ်လောက် ကြာတတ်ကြောင်းနဲ့ အနီစက်တွေ ထွက်လာတတ်တယ်ဆိုတာလည်း မှာလိုက်တယ်။ ရေများများတိုက်ဖို့လည်း မှာလိုက်သေးတယ်။ ဆရာမလေး ပြောသလိုပါပဲ နောက်နေ့ကျ မောင်မောင့် ပါးနဲ့ လည်ပင်းတွေမှာ အနီစက်တွေထွက်လာတယ်။ နောက်တစ်ရက် ဆေးခန်းသွားပြတော့ ဆရာမလေးက အသက်ရှူရခက်တာတွေ ၊ ဝမ်းပျက်ဝမ်းလျှောဖြစ်တာတွေ ရှိလား။ နားကိုက်သေးလား ၊ ခေါင်းမူးခေါင်းကိုက်ဖြစ်လားမေးတယ်။ မျက်စိကော ကြည့်လို့ကောင်းလားတဲ့။ မောင်မောင်က လူရည်လည်း လည်တယ်၊ သွက်လည်း သွက်တဲ့ကလေးဆိုတော့ ဆရာမမေးသမျှ ချက်ကျကျ ပြန်ဖြေတတ်တယ်။
ဆရာမက မောင်မောင်ကို စမ်းသပ်ပြီးတော့ ဝက်သက်ရဲ့ နောက်ဆက်တွဲဆိုးကျိုးတွေ မရှိလို့ တော်ပါသေးရဲ့ ဆိုပြီး ပြောတယ်။ ဝက်သက်ရဲ့ နောက်ဆက်တွဲဆိုးကျိုးတွေ အနေနဲ့ နမိုးနီးယားခေါ် အဆုတ်အအေးပတ်တဲ့ ရောဂါတွေ ၊ ပြင်းထန်တဲ့ ဝမ်းပျက်ဝမ်းလျှောဖြစ်တာတွေ၊ မျက်စိအမြင် ချို့ယွင်းသွားတာတွေ ဖြစ်တတ်တယ်။ မောင်မောင့်မှာ ဒီလို လက္ခဏာတွေတော့ မရှိပါဘူး။ အနီစက်တွေကတော့ တစ်ကိုယ်လုံး ထွက်တတ်တယ်။ ၅ ရက်လောက်ဆို ပျောက်သွားလိမ့်မယ်ပြောတယ်။
ပြီးတော့ ဆရာမလေးက ပြောသေးတယ်။ ဝက်သက်ရောဂါဆိုတာ ကြောက်စရာကောင်းတယ် အစ်မရဲ့။ အရင်က ဝက်သက်ကာကွယ်ဆေး မပေါ်ခင် ၁၉၆၃ မတိုင်ခင်လောက်ကဆို တစ်နှစ်ကို အကြမ်းပျဉ်းအားဖြင့် ၂.၆ သန်းလောက်တောင် သေကြတယ်။ အခုလို ကာကွယ်ဆေးတွေ ပေါ်တုန်းအချိန်မှာတောင် ၂၀၁၆ ကဆို တစ်ကမ္ဘာလုံးအနေနဲ့ ၈ သောင်း ၉ ထောင်ကျော်လောက် သေတယ်လို့ WHO က ခန့်မှန်းထားတယ်။ ဒါကြောင့် ကျွန်မက မောင်မောင်လေးကို စိတ်ပူနေတာ။
တော်သေးတယ်။ နောက်ဆက်တွဲဆိုးကျိုးတွေ ဝင်မလာလို့။ ဝက်သက်မှာ သေတယ်ဆိုတာက အဓိက က နောက်ဆက်တွဲဆိုးကျိုးတွေကြောင့်လေ။ ကိုယ်ခံအား မကောင်းတဲ့ ကလေးငယ်တွေ ၊ ကိုယ်ဝန်သည်တွေမှာဖြစ်ရင် နောက်ဆက်တွဲ ဆိုးကျိုးတွေ ခံစားရတတ်တယ်။ ဗီတာမင်အေ ချို့တဲ့တဲ့ ကလေးငယ်တွေမှာ ဖြစ်ရင်လည်း ပြင်းထန်တတ်တယ်။ ဒါနဲ့ အစ်မက ဘာလို့ ကလေးကို ကာကွယ်ဆေး မထိုးပေးတာလဲဆိုပြီး မေးပါလေရော။ မောင်မောင့်မေမေလည်း ကျွန်မက ကလေးနာမှာစိုးတာရော နောက်ပြီး ကာကွယ်ဆေးထိုးပြီးရင် အော်တစ်ဇမ်ဖြစ်တယ်ဆိုပြီး ကြားမိလို့ စိတ်ပူတာနဲ့ မထိုးမိတာပါ ဆရာမ။
ဝက်သက်ကာကွယ်ဆေးထိုးတာကြောင့် အော်တစ်ဇမ်ဖြစ်တယ်ဆိုတာ မဟုတ်ပါဘူး။ ကာကွယ်ဆေးထိုးတဲ့အတွက် အဖျားကြီးပြီး တက်တာမျိုး ရှိပေမယ့် အလွန်ကို ဖြစ်ခဲတဲ့ ကိစ္စပါ။ အခု ကာကွယ်ဆေးမထိုးဘဲနေတော့ တကယ်တမ်းဖြစ်လာတော့ အစ်မလည်း စိတ်ပူရ ကလေးလည်း ခံစားရတယ်။ နောက် ကာကွယ်ဆေးတွေ ထိုးပေးဖို့ ရှိခဲ့ရင်လည်း မထိုးဘဲ မနေပါနဲ့ အစ်မ။ အခုလည်း ကလေးကို အားပြန်ရှိအောင် လတ်လတ်ဆတ်ဆတ် ဟင်းသီးဟင်းရွက်တွေ များများကျွေးပေးပါ။ အနီစက်တွေ အကုန်ထွက်ပြီး ၄ ရက်လောက်နေပြီးမှ မူကြိုပို့ပါဆိုပြီး သေချာမှာကြားလိုက်ပါတော့တယ်။
Author : Dr. မေ